Norsk fjellsenter ligg midt i Lom sentrum, og midt mellom tre nasjonalparkar – Jotunheimen, Breheimen og Reinheimen. Senteret arbeider med fjellet og menneska – og bruken av fjellet i førhistorisk tid. Halvparten av alle brearkeologiske funn i verda er funne kring fjellsenteret i Nord-Gudbrandsdalen. Sommaren 2023 opna ei heilt ny utstilling der ny kunnskap om bruk av høgfjellet blir formidla.  

Gjenstandar, datering av desse og kombinasjon av kunnskap gjev oss eit større bilete av korleis fjellet har vore brukt i tidlegare tider. Om jakt og fangst. Om ferdsel og handelsruter og varer som vart frakta til og frå fjellbygdene. Om metodar for å koma seg fram, og kva som var med i eit reisefylgje. Eit unikt innblikk i denne spanande historia får du ved å besøke Norsk fjellsenter i Lom. 

Norsk fjellsenter driv Klimapark 2469 ved foten av Galdhøpiggen – med den spektakulære istunnelen der du som gjest får vandre inn i 7000 år gamal is. Framover vil Norsk fjellsenter utvikle konseptet Fjellviten for betre overvaking av klimaendringar i høgfjellet.

Fjellsenteret har eigne samlingar og er delkonsolidert med Gudbrandsdalsmusea. Næraste nabo er Presthaugen – Lom bygdemuseum.