Glømsdalsstugu –
Lom bygdemuseum

Historiske Glømsdalsstugu i Lom bygdemuseum er ei flott rame kring store feiringar eller rolege lag. Stugu ligg som del av det historiske tunet i Presthaugen, sentralt i Lom. 

Det heiter seg at Glømsdalsstugu vart reist av ein friar som hadde lova prestedottera i Vågå det finaste huset i Lom om ho ville gifte seg med han. Bryllaup vart det og friaren heldt ord – med handverk du kan beundre i Presthaugen i dag. Så kostbar var Glømsdalsstugu å byggje, at bonden laut selje unna halve garden for å betale for brudebustaden.

Det vart lenge sagt at bonden endåtil hadde lagt sølvmyntar mellom stokkane i Glømsdalsstugu. Men då bygget vart fløtt til Presthaugen, viste det seg at det berre var mose mellom stokkane. Om brura visste dette, er uvisst.