Dei ni historiske tømmerhusa i Jutulheimen er sette opp som inntunet til ein gamal storgard. Mellom anna to stover, ein stall med stalltrev og ei smie. Husa er frå 1600-, 1700- og 1800-talet og kjem frå ulike gardar i Vågå.

Jutulheimen er kalla opp etter næraste naboen, trollet Jutulen, som held til i berget innanfor Jutulporten rett nedanfor tunet. Eventyrsankarane Asbjørnsen og Moe gjorde Jutulporten kjend i heile Noreg då dei skreiv ned eventyret om «Jutulen og Blessomen» – som du i dag ser fleire landemerke etter i Vågå. Omvisarane våre fortel deg gjerne korleis det heile gjekk føre seg.

I Jutulheimen kan du etter avtale bli vist om i utstillingar om den legendariske fjellkaren Jo Gjende og den mest like kjende treskjeraren Jo Visdal, og dessutan ei utstilling om instrument frå heile Gudbrandsdalen.

Gjennom hausten og våren er det Kveldsseto i Jutulheimen, kulturhistoriske foredrag og arrangement. Alle er velkomne til å smake på tradisjonell mat og høyre spanande foredrag.

Vågå historielag, stifta i 1929, er eigar av Jutulheimen med samlingar. Staden der bygdetunet Jutulheimen gradvis vart etablert, heitte opphaveleg Kustigholet, før tunet i 1956 fekk namnet Jutulheimen. Bygdetunet vart offisielt opna 21. juli 1957. I 2003 vart Musea i Nord-Gudbrandsdalen etablert, frå 2008 fusjonert til regionmuseet Gudbrandsdalsmusea AS.