Lesja bygdemuseum Bygdatunet er eit intimt og aktivt museum i Gudbrandsdalsmusea. Gjennom sommaren er det stor aktivitet i dei gamle husa på tunet. Saum og matstell, spinning og hesjing av høy.

Saman med over 200 friviljuge krefter i ulike lag og miljø gir vi besøkande eit unikt innblikk i tradisjonelle og høgst levande mat- og handverkstradisjonar i Gudbrandsdalen. Slik er museet og dei friviljuge med på å sikre kulturarven for framtida.

Lesja bygdemuseum formidlar kunnskap om både materiell og immateriell kulturarv heile året gjennom arkiv og utstillingar, kurs og foredrag. Museet har eigen, flott museumsbutikk med bøker og handverksprodukt frå mange lokale leverandørar. 

I 2025 etablerte Gudbrandsdalsmusea, med økonomisk støtte frå Sparebankstiftelsen, ein levande grønsakhage på Lesja bygdemuseum. Prosjektet har fått namnet Grønne røtter. I hagen lærer born og unge bærekraftig hagebruk, lokal matkultur, beredskap og naturforståing. Hagen blir til i samarbeid med Sofia Maria Bang Elm frå Avdem Gardsgrønt.

På museet held og bygningsvernrådgjevartenesta for Gudbrandsdalen til. Treng du råd om kva du skal gjere med eit gamalt bygg? Rådgjevaren har spisskompetanse innanfor antikvarisk arbeid på eldre hus, byggeskikk og handverkstradisjonar i Gudbrandsdalen.