Lat att augo. Med litt fantasi kjenner du smaken av nykinna smør, eller du ser for deg dei tolv ungane som ein gong fekk plass i den vesle husmannsstova. 

Dei historiske tømmerhusa er henta frå gardar i Lom, Skjåk og Vågå. Her er setertun, husmannsplass og skulestue – og det største stabburet i landet, det såkalla Storstabburet frå 1613. I Presthaugen kan du undre deg over kvifor det er stukke hestehår inn veggen, og sjå om du finn hola etter fattigfolket som gjorde seg til tjuvar for å stogge svolten i ei smal tid.

Lom heimbygdslag vart etablert i 1925 for å kjøpe ei samling på 355 gjenstandar frå Olav Aukrust. Til å begynne med hadde dei utstillingar i prestegarden, til stemneplassen Presthaugen vart teken i bruk som museumsområde. I 2003 vart Musea i Nord-Gudbrandsdalen etablert, som fusjonerte til regionmuseet Gudbrandsdalsmusea AS i 2008. Presthaugen ligg rett bak Norsk fjellsenter. 

Frå onsdag til laurdag i juli månad blir det program med bakst og husflid, foredrag og konsertar. Laurdag 21. juni blir det samling av dyr og folk på Presthaugen i Lom.

Meir informasjon kjem etter kvart!

Velkomen innom!