Norsk Reservist Forbund Gudbrandsdal (NROF) og Gudbrandsdalsmusea inviterer til foredrag med Olav Haraldseid. Tema er om krigen og motstandskampen i Nord-Fron.
2025 var jubileumsår for frigjeringa av Noreg. Etter fem lange år med krig, okkupasjon og motstandskamp var Noreg igjen fritt. Mange nordmenn deltok i motstandskampen, både i Noreg og utanfor landets grenser, gjennom militær motstand, sivil motstand og i regulære kampar, og i skipsfarten.
I Gudbrandsdalen stod motstandskampen og Milorg sterkt med fleire motstandsgrupper som alle gjennomførte sabotasjeaksjonar. Lokalt var motstandsgruppa Achilles aktiv.
I 2026 er det 80 år sidan Heimevernet vart oppretta. Stamma i Heimevernets første år var stort sett veteranar frå motstandsrørsla under den andre verdskrigen. Soldatar frå Milorg og kompani Linge bidrog inn i Heimevernet med kompetanse, kunnskap og erfaring.
I det høve inviterer NROF og Gudbrandsdalsmusea til foredrag med Olav Haraldseid. Foredraget vil fyrst og fremst dreie seg om åra 1944 til 1945, og då hovudsakeleg om oppbygginga av Milorg og noko om motstandsgruppa Achilles.
Olav Haraldseid har dei siste tjue åra lagt ned mykje tid for å setja seg inn i kva som skjedde i Nord-Fron under krigen. Olav har i fleire år hatt tilgang til arkivet på Heimefrontmuseet og han har også vore på Riksarkivet. Olav hadde fleire møte og samtale med Wilhelm Molberg Nilsen, og treff med andre personar med kjennskap til historia. I tillegg har han hatt stor nytte av dokument og dagbøker etter far sin, Sigurd Haraldseid. Olav har òg fått tilgang til eit intervju som vart gjort med Hans Kleiven på 1970-talet.
Tema: Milorg og Achilles: Motstandskamp i Midt-Gudbrandsdalen
Når: 19. april klokka 18.00
Kvar: Dale-Gudbrands gard, konferansesalen
Påmelding: p-hageli@online.no
Påmeldingsfrist: 15. april
Inngang: Gratis!
Program:
Kl. 18.00 Velkommen v/kaptein Per Gunnar Hagelien, Heimevernet og NROF
Kl. 18.15 Helsingstale frå leiar i NROF Gudbrandsdalen John Einar Høystad og direktør i Gudbrandsdalsmusea Knut Aastad Bråten
Kl. 18.30 Foredrag v/Olav Haraldseid
Kl. 21.00 Avslutning
Arrangørar: NROF Gudbrandsdalen saman med Gudbrandsdalsmusea og Heimevernet
Vel møtt!
